கவிஞர் கோ.இராஜசேகர் அவர்களின்

“வேடிக்கைப் பார்க்கிறான் மனிதன்”

நூல்                       : வேடிக்கப் பார்க்கிறான் மனிதன்

ஆசிரியர்              : கவிஞர் கோ.இராஜசேகர்

வெளியீடு           : வாசகன் பதிப்பகம், சேலம்.

பக்கங்கள்           : 64                                                                                                          

விலை                  : ரூ. 50 /-

துள்ளலும் துடிப்பும் நிறைந்தது இளமைப்பருவம். இந்த துள்ளலும் துடிப்பும் இளைஞர்களை உந்தும் உந்துசக்தியாகவும் திகழ்கிறது. இந்த உந்துசக்தியை நல்லவற்றை நோக்கி செலுத்தும் இளைஞர்கள், சாதனையாளர்களாகவும், பொழுதுபோக்கிற்காக செலவழிப்பவர்கள் சாமானியர்களாகவும் சமூகத்தில் வலம் வருகிறார்கள்.

சாமானிய இளைஞர்களிலிருந்து சாதனையாளனாய் தன்னை உயர்த்திக் கொள்ள ஆசைப்படும் இளைஞர்களுள், கவிதையை தனது ஆயுதமாய் ஏந்தி “வேடிக்கைப் பார்க்கிறான் மனிதன்” என்னும் தன் முதல் கவிதைத் தொகுப்போடு இலக்கிய உலகிற்கு வருகை தந்திருக்கிறார் கவிஞர் கோ.இராஜசேகர்.

சமூக நோக்கமும் பண்பாட்டை பாதுகாக்க வேண்டுமென்ற எண்ணமும் கவிஞர் கோ.இராஜசேகர் அவர்களிடம் நிறைந்திருப்பதை அவரின் பெரும்பாலான கவிதைகள் உணர்த்துகின்றன.

இன்றைய பெற்றோர்கள், குழந்தைகளை பெற்றெடுக்க கவனம் செலுத்துவதைப் போன்றே அவர்களை வளர்ப்பதிலும் அதிக கவனம் செலுத்தி வருகின்றனர். பொதுத்தேர்வு எழுதும் மாணவர்களைக்காட்டிலும் அவர்களின் பெற்றோரே மிகுந்த பதட்டத்துடனும் திட்டமிடல்களுடனும் கனவுகளை சுமந்து காத்திருக்கின்றனர். இதை,

“அவளுக்கு

மீண்டும் ஒருமுறை

பிரசவ வலி…

மகனின்

தேர்வு முடிவு…!”

என்று நயம்பட சுட்டிக்காட்டுகிறார் கவிஞர்.

ஒரு காட்சியை சாமானியர்கள் பார்ப்பதற்கும் கவிஞர்கள் பார்ப்பதற்கும் வேறுபாடு உண்டு. சாமானியர்கள் காட்சிகளாய் பார்த்து கடந்து செல்வதை, கவிஞர்கள் தங்களின் வித்தியாசமானப் பார்வையால் கவனிக்கச் செய்கின்றனர். கவிஞர்களுக்கே உரித்தான அழகியல் பார்வையை வித்தியாசமாக பதிவு செய்யும் கவிஞரின் பார்வைக்கு இக்கவிதை ஓர் எடுத்துக்காட்டு.

“எத்தனை

புள்ளிக்கோலமென்று

தெரியவில்லை

உன் முகப்பருக்கள்…”

வேலையில்லா திண்டாட்டத்துக்குமிடையே எப்படியாவது ஒரு நல்ல வேலை கிடைத்துவிட வேண்டுமென இன்றைய இளைஞர்கள் பல முயற்சிகளை மேற்கொண்டு வருகின்றனர். அதிலும் குறிப்பாக அரசுப்பணிகளைப் பெற இளைஞர்கள் பயிற்சி மையங்களை நாடும் போக்கு அதிகரித்து வருகிறது. பயிற்சி மையங்களைக் காட்டிலும் இளைஞர்களுக்கு தேவையான அனைத்தும் நூல்களில் உள்ளது என்பதை திறம்பட தன் கவிதையில் சுட்டிக்காட்டுகிறார் கவிஞர் கோ.இராஜசேகர் அவர்கள்.

“ஊரில் பொது நூலகம்

அனைத்து

இருக்கைகளும்

காலியாக இருக்கிறது…

மாதம்

பல ஆயிரம் வசூலிக்கும்

பயிற்சி மையங்கள்

நிரம்பிக்கிடக்கின்றன…!”

எள்ளலும் நகைச்சுவையும் கவிதைகளில் இழையோடுவது வாசகர்களின் வாசிப்பை மேலும் சுவாரசியமாக்கும். சிரித்த முகத்துடன் இருப்பவர்களை எல்லோருக்கும் பிடிக்கும். பரபரப்பான இன்றைய உலகில் தங்கள் அன்றாட பணிகளுக்கிடையே மனிதர்கள் சிரிப்பதற்கு கூட மறக்க வைத்துவிடுகிறது இன்றைய சூழல். இதில் சீப்பிலிருக்கும் பல்லையும் சிரிப்பையும் இணைத்து எள்ளல்சுவையை தன் கவிதை வழி முன்வைக்கிறார் கவிதை.

“எப்பொழுதும்

சிரித்த முகத்துடன்

பல்லைக் காட்டிக்கொண்டே

இருப்பதால்தான்

அனைவருக்கும்

பிடித்துப்போகிறது

சீப்பை…!”

நாகரிக வளர்ச்சி என்ற பெயரில் ஆரோக்கியமான உணவுகளையும் ஒதுக்கும் போக்கு அதிகரித்து வருகிறது. சுவையாலும் நிறத்தாலும் குழந்தைகளை ஈர்க்கும் துரித உணவுகளும் உண்பதற்கு தயார் நிலையில் கிடைக்கும் உணவுகளும் ஆரோக்கியமானதல்ல என்று அறிந்தும் அதையே விரும்பி உண்கின்றனர். இதை,

“குழந்தைகளின் காலம்

மாறிவிட்டது

மண்ணில் விழுந்த

பொருளை வேண்டாமென்று

ஒதுக்கிய நிலை

கடந்து…

மண்ணில் விளைந்த

உணவையே வேண்டாமென்று

ஒதுக்கும் நிலையாக…”

என்று அழகாக சுட்டிக்காட்டுகிறார்.

“சொட்டும்

நீரில்

இசை

காலிப்பாத்திரம்”

மழையின் ஓசையை இசையாய் ரசிக்கும் கவிஞரின் பார்வையை பதிவு செய்யும் இக்கவிதையில் ஹைக்கூவின் சாயல் தெரிவது இயல்பானதே.

“இளைஞர்களிடம் தென்படும் ஆர்பாட்டம் கோ.இராஜசேகரின் கவிதைகளில் தென்படவில்லை. வார்த்தைகளைச் சூடாக்கும் வெற்று ஆவேசங்கள் எதற்கும் உதவாது என்பதை இந்த இளவயதிலேயே இராஜசேகர் கற்றுக் கொண்டிருக்கிறார் என்று தோன்றுகிறது. எனவே அவரது கவிதைகளில் ஆர்பாட்டமில்லாத சாந்தம் குடிகொண்டிருப்பதைப் பார்க்க முடிகிறது” என்று நூலின் அணிந்துரையில் சுட்டிக்காட்டியிருக்கும் முனைவர் கி.பார்த்திபராஜா அவர்களின் வார்த்தைகளை கவிஞர் கோ.இராஜசேகரின் கவிதைகள் உண்மையென உணர்த்துகின்றன.

முதல் தொகுப்பில் முத்திரை பதிக்கும் சிந்தனைகளை கவிதைகளாக வார்த்தெடுத்திருக்கும் கவிஞர் கோ.இராஜசேகர் தன் கவிதைகளின் வாயிலாக அடையாளம் காணப்படும் தூரம் வெகுதொலைவில் இல்லை. இதற்கு இன்னும் அதிக வாசிப்பும், தன் கவிதைகளை அடுத்த தளத்துக்கு எடுத்துச் செல்லும் அவரது முயற்சியுமே அவருக்கு துணையாயிருக்கும். தொடர்ந்து முயன்றால் வெற்றிச் சிகரம் வசப்படும்.

நூல் மதிப்புரை

கவிஞர் ச.கோபிநாத்

சேலம்

9790231240

நம்பிக்கையும் நானும்… 

(பாகம்-1)

நூல்                       : நம்பிக்கையும் நானும் (பாகம்-1)

ஆசிரியர்             : கவிஞர் ஏகலைவன்

வெளியீடு         : வாசகன் பதிப்பகம், சேலம்.

பக்கங்கள்          : 160

விலை                 : ரூ. 100 /-

                “அனுபவம் என்பது உனக்கு என்ன நிகழ்கிறது என்பது அல்ல. அனுபவம் என்பது உன் வாழ்வில் நடக்கும் நிகழ்வுகளிலிருந்து நீ என்ன ஏற்றுக்கொள்கிறாய் என்பதிலேயே உள்ளது” என்கிறது அனுபவம் குறித்த ஆன்றோரின் வாக்கு.

                நாம் வாழும் இந்த சமூகத்தில் வாழும் மனிதர்கள் ஒவ்வொருவரின் வாழ்க்கையும் நமக்கு பாடமே. அதிலும் குறிப்பாக வெற்றியாளர்களின் வாழ்க்கை நமக்கு நல்வழிக்காட்டும் என்பதில் சிறிதும் ஐயமில்லை. அத்தகைய வெற்றியாளர்களின் வாழ்க்கை அனுபவங்களை அவர்களுடனான நேர்காணலில் பதிவு செய்த கவிஞர் ஏகலைவன் அவர்களின் நேர்காணல் கட்டுரைத் தொகுப்பாக, வெற்றியாளர்களின் அனுபவத்திரட்டாக மலர்ந்திருக்கிறது “நம்பிக்கையும் நானும்…(பாகம்-1) நூல்.

எழுத்துச் செல்வர் லேனா தமிழ்வாணன், தலைமையாசிரியர் மு.ஆ.உதயக்குமார், பிரான்ஸ் தமிழ்ச்சங்கம் பாரிஸ் ஜமால், சீர்காழி மா.இராமர், பாவையர் மலர் ம.வான்மதி, சமூக ஆர்வலர் ஹரிஹர சுப்ரமணியன், கவிமாலைக் கவிஞர் தியாக.இரமேஷ், பன்முகத் திறனாளர் கோபால நாராயணமூர்த்தி, முனைவர் அ.சங்கரலிங்கம் என ஒன்பது வெற்றியாளர்களின் வாழ்க்கை அனுபவங்களை உள்ளடக்கியிருக்கிறது இந்த நூல்.               

                நூலில் இடம்பெற்ற வெற்றியாளர்கள் ஒவ்வொருவரின் வாழ்க்கையையும் அவர்களது பிறப்பு முதல் தற்கால செயல்பாடுகள் வரையிலான அனைத்துத் தகவல்களையும் தொகுத்திருப்பது நூலின் தனிச்சிறப்பு. அவர்கள் வாழ்ந்த சூழலும் வெற்றிக்கு தங்களை தயார்படுத்திக் கொண்ட விதத்தையும் வெற்றியாளர்கள் ஒவ்வொருவரும் பகிர்ந்து கொண்ட விதம் வாசகர்களை வெற்றியை நோக்கி இட்டுச்செல்லும் கலங்கரை விளக்காக விளங்குகிறது.

                வாழ்க்கையில் தாங்கள் எதிர்கொண்ட சவால்களை கடந்துவந்த விதத்தை வாசிக்கும் இளைய தலைமுறை வாசகர்களுக்கு இந்நூல் வரப்பிரசாதமாக விளங்கும் என்பதில் சிறிதும் ஐயமில்லை.

                “எழுத்துலக மார்க்கண்டேயன்” லேனா தமிழ்வாணன் அவர்கள் எழுத்து, பேச்சு என்று இன்று உலகை வலம் வரும் சாதனையாளர். அவரது முதல் படைப்பை அவரது தந்தை அமரர் தமிழ்வாணன் அவர்கள் கல்கண்டு இதழில் இடம்பெற செய்த அனுபவம் குறித்த பதிவு சுவாரசியமானது. அதிலிருந்து தான் கற்றுக் கொண்ட பாடத்தை எழுத்துச் செல்வர் லேனா தமிழ்வாணன் அவர்கள் கூறியிருக்கும் விதத்திலிருந்தே அவரது சாதனைகளுக்கான அடித்தளங்களை கண்டறிய முடிகின்றது.

                சராசரியான தேர்ச்சி விகிதத்தை பெற்று வந்த பள்ளியை தன் தொடர் முயற்சியாலும் தேர்ந்த திட்டமிடல்களாலும் ஆசிரியர்களின் ஒத்துழைப்புடன் நூறு சதவிகித தேர்த்தி பெறும் பள்ளியாக உயர்த்திய தலைமையாசிரியர் மு.அ.உதயக்குமார் அவர்களின் வாழ்க்கை ஒரு நல்ல தேர்ந்த தலைமைக்கான எடுத்துக்காட்டாக விளங்குகின்றது.

                40 ஆண்டுகள் பிரான்ஸில் வாழ்ந்தும் அந்நாட்டின் குடியுரிமை பெறாமல், திரைக்கடல் ஓடி திரவியம் தேடும் வாழ்வில் தமிழை செழிக்க செய்து பிரான்ஸில் தமிழ்ச்சங்கம் உருவாக்கியவர்களுள் ஒருவராகவும் விளங்கும் பிரான்ஸ் தமிழ்ச்சங்கம் பாரிஸ் ஜமால் அவர்களின் வாழ்க்கை சாதாரண மனிதர்களையும் சாதிக்கத் தூண்டும். நடிகர் திலகம் செவாலியே சிவாஜி கணேசன் அவர்களுடனான தன் உறவை இவர் விளக்கியிருக்கும் விதம் கடல்கடந்து வாழும் தமிழர்களிடையே இருக்கும் விருந்தோம்பல் பண்புக்கான ஒப்பற்ற எடுத்துக்காட்டு.

                கல்வியே மனிதர்களுக்கு வழங்கப்படும் செல்வங்களுள் எல்லாம் உயர்ந்தது. அத்தகைய உன்னதமான துறையில் தொடர்ந்து செயலாற்றும் கல்விச் செயல்பாட்டாளர் சீர்காழி மா.இராமர் அவர்களின் மாணவர்களை ஊக்குவிக்கும் கல்வி சார்ந்த செயல்பாடுகளுக்கான காரணங்களும் இவர் தொழிலதிபராக உயர்ந்த விதமும் எல்லோருக்குமான இனிய பாடங்கள்.

                இல்லத்தரசி, தொழிலதிபர், சமூக ஆர்வலர், பத்திரிக்கையாசிரியர், படைப்பாளர் என பன்முகத்தன்மையோடு சமூகப்பணியாற்றியபடி கண்டெய்னர் தொழிலில் தனிமுத்திரை பதிக்கும் பாவையர் மலர் ம.வான்மதி அவர்களின் வாழ்க்கைப் பயணம் சாதிக்கத் துடிக்கும் பெண்களுக்கான தேர்ந்த வழிகாட்டுதல்.

                சுயநலம் பெருகிவரும் இன்றைய சூழலில் பிறரின் நிலையறிந்து, அன்புள்ளத்தோடு அனைவருக்கும் உதவும் சேவை மனதோடு செயலாற்றி சமூக வளர்ச்சிக்காக பணியாற்றும் தன்னார்வ தொண்டு நிறுவனங்களை ஒருங்கிணைக்கும் சமூக ஆர்வலர் ஹரிஹர சுப்ரமணியன் அவர்களின் வாழ்க்கை இம்மண்ணில் இன்னும் இருக்கும் மனிதநேயத்திற்கான சாட்சியம்.

                சிங்கப்பூரில் பணியாற்றியபடி அங்கு நடக்கும் தமிழ் நிகழ்வுகளை சிங்கப்பூர் மற்றும் உலகெங்கும் வாழும் தமிழர்களிடையே கொண்டு செல்லும் நற்பணியாற்றி வருபவர் கவிமாலைக் கவிஞர் தியாக.இரமேஷ் அவர்கள். சிங்கப்பூருக்கு வரும் தமிழறிஞர்களை விருந்தோம்பலால் வியக்க வைக்கும் இவரின்  செயல்பாடுகள் வெளிநாடுவாழ் தமிழர்கள் தமிழ்மீது கொண்டிருக்கும் நேசத்தின் குறியீடுகள்.

                தன் தொடர் முயற்சிகளால் தமிழாசிரியராய், நற்றமிழ் பேச்சாளராக, ஆன்மீக சொற்பொழிவாளராக வலம் வரும் முனைவர் கோபால நாராயணமூர்த்தி அவர்களின் வாழ்க்கை தொடர் முயற்சிகள் நற்பலன்களை வழங்கி நம்மை சாதனையாளர்களாய் உயர்த்தும் என்று உணர்த்துகிறது.

                தன் 25 ஆண்டுகால கல்விப்பணியில் பிள்ளைகளின் வளர்ச்சிக்கு பெற்றோர் செய்ய வேண்டியவை என்ன, ஆசிரியர்கள் செய்ய வேண்டியவை என்னென்ன என்பன போன்ற தேர்ந்த வார்த்தைகளால் வழிகாட்டும் முனைவர் அ.சங்கரலிங்கம் அவர்களின் வாழ்க்கை அனுபவங்கள் எல்லோருக்குமான பாடம்.

                ஒவ்வொருவருடைய நேர்காணலின் நிறைவிலும் அவர்களின் வாழ்க்கை உலகுக்கு சொல்லும் பாடத்தை சுருக்கமாக குறிப்பிட்டிருப்பின் நூல் மேலும் சிறப்பு பெற்றிருக்கும்.

வெற்றியாளர்களின் நேர்காணல்களை வாசிக்கும் வாசிப்பனுபவம், அவர்களோடு நேரடியாக பேசும் உணர்வை தருவது நூலின் தனிச்சிறப்பு. சாதிக்கத் துடிக்கும் சாதனையாளர்களுக்கான வாய்ப்பு வாசலாக இந்நூல் திகழ்கிறது.

                

எலிக்குஞ்சுகளும் படிநெல்லும்

நூல் : எலிக்குஞ்சுகளும் படிநெல்லும் (ஹைக்கூக் கவிதை நூல்)
ஆசிரியர் : கவிஞர் ஸ்ரீ ரங்கராஜபுரம் துளசி
விலை : ரூ. 30-
வெளியீடு : அகநி வெளியீடு, அம்மையம்பட்டு, வந்தவாசி – 604408.

புல்லின் நுனியில் மிளிரும் பனித்துளி, வீடெங்கும் கோலங்களாய் மிளிரும் குழந்தையின் பிஞ்சுப்பாதச்சுவடுகள், தன் வருகையின் சுவடுகளே தெரியாது பூக்களின் மீது அமர்ந்து செல்லும் வண்டுகள் என இயற்கையின் சின்ன சின்ன அம்சங்கள் அத்தனையும் ரசனைக்குரியவை.இத்தகைய சின்ன சின்ன செயல்களில் உள்ள ஆனந்தத்தை அனுபவித்தலே வாழ்தலை அர்த்தமுள்ளதாக்கி, அதை மேலும் அழகாக்கும். மூவரிக் கவிதையாய் கவிதையுலகை வலம் வரும் ஹைக்கூவும் இத்தகைய இலக்கணத்துக்குட்பட்டு, அளவில் சிறியதாயினும் அதன் உள்ளடக்கங்களால் வாசிப்பையும் ரசனையையும் மேம்படுத்துகிறது.

இன்றைக்கு தமிழ் இலக்கிய உலகில் பரவலாக வெளிவரும் படைப்புகளுள் ஹைக்கூவும் ஒன்று. தன் கருத்துச் செறிவால் இன்றைய இலக்கிய உலகில் நீங்கா இடம்பெற்றிருக்கும் ஹைக்கூ கவிதைகளை உள்ளடக்கிய தொகுப்பாக மலர்ந்துள்ளது கவிஞர் ஸ்ரீ ரங்கராஜபுரம் துளசி அவர்களின் “எலிக்குஞ்சுகளும் படிநெல்லும்” ஹைக்கூத் தொகுப்பு.

“களிப்பூட்டவும்
கலவரப்படுத்தவும்
புறப்பட்டுள்ள கவிதைகள்”
என்று ஹைக்கூக் கவிதை முன்னோடி கவிப்பேரருவி ஈரோடு தமிழன்பன் அய்யா அவர்களின் அணிந்துரையோடு தொடங்குகிறத் தொகுப்பின் அட்டைப்படமே நம்மை வெகுவாகக் கவர்கிறது.

உணவு, உடை, இருப்பிடம் மனிதர்களின் அடிப்படைத் தேவைகளுள் முதன்மையானவை. ஆனால் இவையில்லாமலேயே இன்னும் எத்தனையோ பேர் நம் நாட்டில் தவிக்கின்றனர். இத்தகைய சூழலில் தான் நாம் தேசத் தூய்மை பற்றி பேசுகிறோம். கழிப்பறைகள் இல்லாத சூழலில், பெண்கள் இயற்கை உபாதைகளுக்காக பெரிதும் சங்கடத்துக்குள்ளாவதை உணரும் வகையில் எடுத்துரைக்கிறார் கவிஞர் ஸ்ரீ ரங்கராஜபுரம் துளசி அவர்கள்,
“இருட்டில் ஒதுங்கிய
குப்பத்துப் பெண்கள்
விடியலே சற்றுப் பொறு”

நாம் உடுத்தும் ஆடைகள் பயன்படாமல் போகும்போது, அவற்றை மாற்றுப் பயன்பாட்டுக்காக பயன்படுத்துவது நம் இயல்பு. கிழிந்த சட்டையை சோளக்காட்டுப் பொம்மைக்கும், காகங்களை விரட்டவும் போன்று பலவிதமாக பயன்படுத்துவது வழக்கம். நெற்பயிர்களை சேதப்படுத்தும் குருவிகளை விரட்டி, பயிர்கள் சேதமாகாமல் இருப்பதற்கு தன் தாயின் பழைய சேலை பயன்பட்டிருப்பதையும், அப்பாவின் சட்டையை வயற்காட்டுப் பொம்மை அணிந்துகொண்டதையும்
“கரும்போர நெற்பயிர்
குருவி விரட்டுகிறது
அம்மாவின் பழைய சேலை”

“அப்பாவின் கிழிந்த சட்டை
மாட்டிக் கொண்டது
வயற்காட்டுப் பொம்மை”
என இருவேறு ஹைக்கூக்களில் அற்புதமான காட்சிப்பதிவுகளாகப் பதிவு செய்கிறார் கவிஞர்.

குழந்தைகளை எல்லோருக்கும் பிடிக்கும். குழந்தைகளுக்காக எதையும் செய்வது பெரியவர்களின் இயல்பு. அந்த குழந்தைகள் மகிழ்ந்திருப்பதைப் பார்த்து தானும் மகிழ்ந்திருக்கும் ஆனந்தமே தனி. குழந்தை தீபமேற்றுவதையும் அதை காற்று அணைக்காமல் இருக்கக் காற்றை திசை திரும்ப சொல்கிறது இந்த ஹைக்கூ.
“தீபமேற்றுகிறது குழந்தை
வேறு திசை பார்
காற்றே.”

குழந்தைகள் இருக்கும் இடத்தில் மகிழ்ச்சி நிறைந்திருக்கும். அவர்களின் மகிழ்ச்சியில் நம் கவலைகள் மறந்து மகிழ்ந்திருக்கலாம் என கடவுள் குழந்தைகளைத் தேடி வருவதாக சொல்கிறது கவிஞரின் இந்த ஹைக்கூ
“இருக்க இடம் வேண்டி
கடவுள் வருகிறார்
குழந்தைகள் நிறைந்த வீடு”

குழந்தைகளைத் தேடி வரும் கடவுள் குறித்த இந்த ஹைக்கூ எனது “குழந்தைகளைத் தேடும் கடவுள்” நூலில் இடம்பெற்ற
“குழந்தைகளைத் தேடும்
கடவுள்
நிம்மதிப் பெருவாழ்வு”
என்ற ஹைக்கூவை நினைவூட்டுகிறது.

வனங்கள் செழித்திருப்பதற்கு பறவைகளும் ஒரு காரணம். தங்கள் எச்சங்களால் எண்ணற்ற மரங்கள் இம்மண்ணில் வேரூன்ற ஆதாரமாய் இருப்பவை பறவைகள். மக்கள் தொகைப் பெருக்கம், நகரமயமாக்கல் போன்றவற்றின் விளைவுகளால் காடுகள் அழிந்து வருவதையும் மண்வளம் குறைந்து வருவதையும் சமூகப்பார்வையோடு சுட்டிக்காட்டுகிறார் கவிஞர்,
“பறவையின் எச்சத்தில்
தளிர்விடாத பூமி
அழிந்தது வனம்”

இதே இயற்கைப் பார்வையோடு காற்று மாசுபடுவதை சுட்டிக்காட்டுகிறது இன்னொரு ஹைக்கூ
“தீபாவளி
புகையால் கலங்குகிறது
வளி”

பொது நிறுவனங்களில் மக்களின் குறைதீர்க்க புகார் பெட்டிகள் வைத்திருப்பர். புகார் பெட்டிகளில் புகார்கள் இடப்பட்டாலும் அது சார்ந்து எந்தவித நடவடிக்கைகளும் எடுக்காமலிருப்பது நம்பிக்கையை இழக்கச் செய்யும். இதனாலேயே பெரும்பாலான புகார் பெட்டிகள் காலியாக இருக்கின்றன. இதை அற்புதமான காட்சிப்பதிவாக்கி சமூக பிரச்சனையோடு இயற்கையை இணைத்திருக்கிறார் கவிஞர்
“தைரியமாய்
கூடு கட்டியது குளவி
புகார்ப்பெட்டி”

“தினந்தினம்
ஏறி இறங்குகிறது அய்க்கூ
தேசியக் கொடி”
ஹைக்கூ கவிதைகள் மூன்று வரிகளில் அமைந்திருப்பதையும் தேசியக்கொடி மூன்று வர்ணங்களால் அமைந்திருப்பதையும் அழகாக ஒப்பிட்டு தன் அழகியல் பார்வையைப் பதிவு செய்வதுடன், அந்த உணர்வை வாசகர்களின் உள்ளத்துக்கும் கடத்துகிறார் கவிஞர்.

“வீடு திரும்பவேயில்லை
மீன் பிடிக்கச் சென்ற அப்பா
காத்திருக்கும் சிறுவன்”

“வெகுவாகக் குறைந்துவிட்டன
பறவை ஊர்வலம்
செல்பேசிக் கோபுரம்”

“தாலிக்குக் குனிந்தாள்
நிமிரவேயில்லை
அடுப்பங்கரையில் கனவு”
முதலிய முத்திரைப் பதிக்கும் ஹைக்கூ கவிதைகளை தொகுப்பெங்கும் காண முடிகிறது. கவிதைகளுக்கான நிழற்படங்கள் தொகுப்புக்கு மேலும் அழகு சேர்த்திருக்கின்றன.

“எளிய வாழ்வின் இனிமையான காட்சிகளை எந்த பூச்சுமற்று எழுதியுள்ள கவிஞர் துளசியின் பலமே... குறைந்த சொற்களில், செறிவான அர்த்தத்தோடு நம் விழித்திரை முன் பெரிய சித்திரத்தை வரைந்து போவதே” என்று அணிந்துரையில் பாராட்டியுள்ள ஹைக்கூ முன்னோடி கவிஞர் மு.முருகேஷ் அவர்களின் வார்த்தைகளில் உள்ள உண்மையை உறுதிபடுத்துகிறார் கவிஞர் துளசி.

முதல் தொகுப்பிலேயே முத்திரைப் பதிக்கும் ஹைக்கூ கவிதைகளால் வாசகர்களின் இதயத்தில் இடம்பிடிக்கும் கவிஞர் துளசி நல்ல பல படைப்புகளை எதிர்காலத்தில் தருவார் என்ற நம்பிக்கையைத் தருகிறது இத்தொகுப்பு.

மதிப்புரை
கவிஞர் ச.கோபிநாத்
சேலம்
பேச - 9790231240

திமிரும் நீயும் ஒரே சாயல்

ஆசிரியர் : கவிதாயினி ஷர்மிவீரா
வெளியீடு : வாசகன் பதிப்பகம், சேலம்,
விலை : ரூ. 75 /-

மனித மனங்களை புதுப்பித்து, வாழ்வின் சின்னச் சின்ன நிமிடங்களை ரசித்து, வாழ்தலின் ஆனந்தத்தை உணரச்செய்யும் அற்புதம் காதல். கேட்ட கனத்திலேயே மனதில் புத்துணர்வை பூக்கச் செய்யும் மந்திரமான காதலால் வசீகரிக்கப்படாதவர்களே உலகில் இல்லை எனலாம். இளைய இதயங்களை எப்போதும் தன் கட்டுப்பாட்டுக்கள் கட்டிவைத்திருக்கும் காதல் தான், பெரும்பான்மையான கவிதைகள் ஊற்றெடுக்கும் முதற்புள்ளி. அத்தகைய காதல் உணர்வை வாசகர்களின் உள்ளத்தில் தூண்டச்செய்யும் இனிய கவிதைகளுடன் கவிதாயினி ஷர்மிவீரா படைப்பில் வெளியாகியிருக்கிறது “திமிரும் நீயும் ஒரே சாயல்” கவிதை நூல்.

நூலின் தலைப்பைப் போலவே, அட்டைப்படமும் வாசகர்களை வசீகரிக்கும் விதமாக அமைந்திருக்கிறது. ஆண் கவிஞர்களின் படைப்பில் எத்தனையோ காதல் கவிதை நூல்கள் வெளிவந்த வண்ணம் இருக்கும் சூழலில், ஒரு பெண்ணாக தன் காதல் உணர்வுகளை கவிதை வழி வெளிப்படுத்தியிருக்கும் கவிதாயினி ஷர்மிவீரா அவர்களின் தனித்துவத்தால் மிளிர்கிறது இந்நூல்.

“இருளில் தென்பட்ட
ஒளி போல
என் வாழ்வில்
தென்பட்ட  வெளிச்சம்
நீயும்..
உன் காதலும்...!”
என்று தன் காதலின் நேர்மறைப் பக்கங்களைப் பற்றி பேசுகிறார். காதல் பலரது வாழ்க்கையை வெளிச்சத்தின் திசை நோக்கி திரும்பச் செய்து, வெற்றிக்கனிகளை சுவைக்க செய்திருக்கிறது என்பதற்கு சாட்சியாக நிற்கிறது இக்கவிதை.

“ஷர்மி இன்றைய காலத்தின் காதலைக் காட்சிப்பூர்வமாகக் கவித்துவப்படுத்த விழைகிறார். முடிந்த அளவுக்குத் தன் பாடுபொருளாக ஏக்கத்தையும் பிரிவாற்றாமையையும் மாத்திரம் கைக்கொள்ளாமல், முத்தத்தையும் இறுகி அணைத்து, இருவர் கரைந்து ஒருவராவதையும் சேர்த்தே பேசுகிறார்” என்று எழுத்தாளர் ஆத்மார்த்தி தன் அணிந்துரையில் கூறியிருப்பதற்கு சான்றாக இக்கவிதை ஒன்றே போதும்.

“நேற்றைய பொழுதை எண்னி
இன்றைய நிஜத்தை
இழந்து விடாதே!”
என வாழ்வின் எதிர்காலம் குறித்தோ, நடந்தவை குறித்தோ கவலைக் கொள்ளாமல் நிகழ்காலத்தில் கவனம் செலுத்த வேண்டும் என்று காதலுக்கிடையில் எல்லோர்க்குமான பொதுவான கவிதையொன்றையும் தத்துவமாக  முன்வைக்கிறார் இவர்.

காதலில் தோற்பதுவும் வெற்றியே. விட்டுக்கொடுத்தல் குடும்ப வாழ்க்கைக்கு மட்டுமல்ல, காதலுக்கும் அதுவே அடிப்படைப் பண்பு என்பதை ஒரு ஆணின் பார்வையிலிருந்து  சொல்கிறார்.
“கனவிலும்
விவாதம் செய்யும்
என்
செல்ல ராட்சசியை
வெல்ல மனமில்லை..

அவளே
வெற்றி பெறுகிறாள்
காதல் யுத்ததிலும்
முத்தக் களத்திலும்”

காதல், வாழ்க்கைக்கு அர்த்தமளிக்கும் அற்புதம். வாழ்வின் சின்ன சின்ன நிகழ்வுகளில் உள்ள அழகியலை ரசிக்கச் சொல்லித்தரும் பயிற்சிப்பட்டறை இந்த காதல் களம் என்பதை
“காலடிச் சுவடையும்
    முத்தமிட்டுச் சென்றேன்!
     மணலும்
     சுவைக்க ஆரம்பித்தது!”
என்று அழகியலை முன்வைக்கிறார் இவர்.

தாய்மை, பெண்மையின் உயர்வு, பெண்மையின் தனித்துவம், தியாகத்தின் பிறப்பிடம். பிரசவம் என்பது இன்னொரு பிறப்பு என்பார்கள். அந்த பிரசவத்தின் வலியை கவிதையில் பதிவு செய்து, அதன் வழி பெண்களின் தியாகவுணர்வையும் வாசகர்களின் உள்ளத்துக்குள்  கடத்துகிறார் இவர்.
“ஓருயிரா
ஈருயிரா என
குழப்பம் திகைக்க...

இறைவா!
இதோ எடுத்துக்கொள்
என் உயிரை என
நானே முணங்க...

என்னை வந்தடைந்தது
நான் பெறா
இரு உயிர்களும்..

நீ..
நான்..
நாம்!”
என தாய்மையின் பெருமை குறித்து கூறுகிறார்.

“நம்
விரல்கள் இணைந்தன...
நமக்கு முன்னே
முத்தமிட்டுக் கொண்டன
நம் மோதிரங்கள்!”
காதலில் உள்ள அழகியலை அப்படியே வாசகர்களின் இதயத்துள் கடத்துகிறார் இவர். விரல்கள் இணைவதில் முட்டிக்கொள்ளும் மோதிரங்கள், முத்தமிட்டுக் கொள்கின்றன என்ற அழகியல் பதிவின் மூலம் கவிதைக்குண்டான அழகியலை வெளிப்படுத்துகிறார்.

காதலிக்கும் பெண்களுக்குண்டான இயல்புகளை பட்டியலிடும் “மீண்டுமோர் காதல் தாகம்”, முத்தங்களை பாடலென சிலாகிக்கும் கவிதையென தொகுப்பெங்கும் நல்ல நல்ல கவிதைகள் வாசிக்க கிடைக்கின்றன.... கவிதைகளுக்கு மேலும் அழகூட்ட நல்ல படங்களை தேர்ந்தெடுத்து இணைத்திருப்பது தொகுப்பை மேலும் அழகூட்டுகிறது.

“எது நிஜம்... எது புனைவு... என்கிற கேள்வியே எழாதவாறு கவிஞர்களுக்கே உரித்தான மொழியில் விவரிப்பது தான் ஒரு எழுத்தாளனின் வெற்றி. அப்போது தான் இரு மனமும் அந்த மனதின் காதலும் ஒன்றுடன் ஒன்றான நிகழ்வுகளாய் சுவாரஸ்யம் கூட்டி, படிக்கும் நம்மையும் காதலர்களாய் கட்டுக்குள் வைக்கும். அதில் நம் கவிஞர் ஷர்மிவீரா வெற்றி பெற்றுள்ளார்” என்ற பாவையர் மலர் இதழ் ஆசிரியர் வான்மதி அவர்களின் வார்த்தைகளுக்கிணங்க, “திமிரும் நீயும் ஒரே சாயல்” என்ற காதல் கவிதைகள் தொகுப்பின் வாயிலாக கவியுலகில் அடியெடுத்து வைத்திருக்கும் கவிதாயினி ஷர்மிவீரா இத்தொகுப்பில் வெற்றி முத்திரை பதித்திருக்கிறார். இன்னும்பல தொகுப்புகளை வெவ்வேறு பாடுபொருளில் தருவார் என்ற நம்பிக்கையை தருகிறது இத்தொகுப்பு.

ஆக்கம்
கவிஞர் ச.கோபிநாத்
சேலம்
9790231240