நூல்                                       : கதம்பப் பூக்கள்

தொகுப்பாசிரியர்             : எழுத்தாளர் ஆர்.மணிவண்ணன்

வெளியீடு                          : பாவைமதி வெளியீடு

பக்கங்கள்                          : 80

விலை                                  : ரூ. 60 /-

                பூக்கள் என்றாலே அழகு தான். அதிலும் ஒரே இடத்தில் பூத்திருக்கும் பல்வகையான பூக்கள் நறுமணத்தாலும், வண்ணங்களாலும் நம்மை ஈர்த்து மனதிற்கு புத்துணர்வையும் பார்வைக்கு பரவசத்தையும் தரவல்லவை.

                பலவண்ண பூக்கள் நந்தவனத்தை அலங்கரிப்பதைப் போல கதை, கவிதை, நகைச்சுவைத் துணுக்குள் போன்ற பல்சுவை படைப்புகளால் அலங்கரிக்கப்பட்டிருக்கிறது எழுத்தாளர் ஆர்.மணிவண்ணன் அவர்களின் “கதம்பப் பூக்கள்” நூல்.

                அப்பாவும் அம்மாவும் பொருளீட்ட பணிக்கு செல்வது இன்றைய சூழல். கூட்டுக்குடும்பங்கள் குறைந்து தனிக்குடும்பங்கள் பெருகிவரும் இன்றைய சூழலில் குழந்தைகள் மீதான பெரியவர்களின் அக்கறையும், குழந்தைகளுடன் பெற்றோர்கள் செலவிடும் நேரமும் குறைந்து வருகிறது. இத்தகைய சூழலில் குழந்தைகளுக்கு உற்றதுணையாய் இருப்பவை பொம்மைகளே என்ற கருத்தை “தனிமை” என்றொரு கவிதையில் முன்வைக்கிறார் கவிஞரான எழுத்தாளர் ஆர்.மணிவண்ணன் அவர்கள்.

                “அந்த வீட்டில்

                குழந்தைகளிடம்

                அன்பு காட்ட

                யாருமில்லை

                பொம்மைகளைத் தவிர!”

                மனிதர்கள் இளமைக்காலத்தில் வாய்ப்புகளையும் பணத்தையும் தேடி ஓடுகின்றனர். அந்த ஓட்டத்தில் அவர்கள் தங்களை சுற்றியுள்ள சுற்றத்தாரையோ தன் உடல் ஆரோக்கியத்தையோ கண்டுகொள்வதில்லை. இதனால் ஆரோக்கியம் குன்றுவதும், பின் வயதான காலத்தில் இழந்த ஆரோக்கியத்தை மீட்டெடுக்க ஈட்டிய பணத்தை செலவழிப்பதும் நடைமுறை யதார்த்தமாக விளங்குகிறது. இதை “செல்வம்” என்றொரு கவிதையில் சுட்டிக்காட்டுகிறார் நூலாசிரியர்.

                “தனது செல்வம்

                செழிக்க வேண்டும்

                என உடல்நிலையை

                கருதாத ஒருவனின்

                செல்வம் சேர்ந்தது

                அருகில் உள்ள

                மருத்துவரிடம்!”

                அரசியல்வாதிகளில் பெரும்பாலானோர் சொல்லொன்றும் செயலொன்றுமாக செயல்பட்டு வருவதை சுட்டிக்காட்டுவதுடன், மேடையில் ஒரு முகமும் மேடைக்குக் கீழ் மற்றுமொரு முகமுமாக இயங்கும் அவர்களின் தன்மையை “கேடு” என்னும் நிமிடக்கதையின் வாயிலாக நம் கண்முன் கொணர்கிறார் நூலாசிரியர் ஆர்.மணிவண்ணன்.

                “மது வீட்டுக்கு, நாட்டுக்கு, உடலுக்கு, உயிருக்கு கேடு என்று மேடையில் முழங்கிய அரசியல்வாதி, தன் வீட்டிற்கு புறப்படும்போது டிரைவரிடம் சொன்னான், ஒரு ஆஃப் பிராந்தி வாங்கி வச்சிடு”

                நாவின் சுவை அரும்புகளைத் தூண்டும் அறுசுவைப் போல், மனதின் உற்சாக அரும்புகளை துளிர்க்க செய்பவை நகைச்சுவை. யாருடைய மனமும் புண்படாதவாறு இருக்கும் நகைச்சுவைகாள் காலம் கடந்தும் ரசிக்கப்படும்.

                அன்றாட நிகழ்வுகளின் மீதான நமது பார்வையை நகைச்சுவை துணுக்குகளில் முன்வைப்பதோடு மட்டுமின்றி, அவற்றின் வாயிலாக நல்ல கருத்துகளை கூறி விழிப்புணர்வும் ஏற்படுத்த முடியும். இதை உணர்த்தும் வகையில் கொளுத்தும் வெயிலையும், அந்த வெயிலில் இளைப்பாற்றிக் கொள்ள ஏடிஎம் மையங்களை நோக்கி சிலர் செல்வதையும் தன் நகைச்சுவை வழி சுட்டிக்காட்டுகிறார் நூலாசிரியர்.

               

“அடிக்கடி ஏ.டி.எம்க்கு போறீயே… பணம் நிறைய இருக்கா?”

                “நீ வேற…வெயில் தாங்க முடியல…கொஞ்சம் ரிலாக்ஸ் பண்ணலாம்னு தான்”

                இன்றைய சூழலில் செய்திகளை மக்களிடம் சென்று சேர்ப்பதிலும், மக்களிடம் விழிப்புணர்வை உண்டாக்குவதிலும் சமூக ஊடகங்களின் பணி அளவிட இயலாதது. இதை தன் நகைச்சுவையில் அழகாக முன்னிறுத்துகிறார் எழுத்தாளர் ஆர்.மணிவண்ணன் அவர்கள்.

               

“மகாராஜா ஏன் மாறுவேடத்தில் போருக்குப் புறப்படுகிறார்?”

                “ஓடி வரும்போது நிறைய பேர் வீடியோ எடுத்து சோஷியல் மீடியால போடுறாங்களாம்”

                “நட்பு, சமூக நலம், காதல், பிரிவு என கவிதைகளாகவும், மண், பணம், மனம், குரு பக்தி என கதைகளாகவும் குடும்பம், அரசியல், சினிமா, பள்ளி, மன்னர் என நகைச்சுவை துணுக்குகளாகவும் அனைத்து களங்களிலும் உள்ளவற்றை பூக்களாய் தொடுத்து கலவையாய் கதம்ப்பூவாய் கையில் தொடுத்திருக்கும் கதம்பப்பூக்கள் தயாரிப்பாளர் மாணிவண்ணனை வாழ்த்துவோம்” என நூலின் பதிப்புரையில் பதிப்பாளர் ‘பாவையர் மலர்’ ஆசிரியர் டாக்டர்.ம.வான்மதி அவர்கள் குறிப்பிட்டிருப்பதை நூலின் ஒவ்வொரு பக்கமும் மெய்ப்பிக்கின்றன.

                படைப்பாளர்கள் கதை, கவிதை, கட்டுரை போன்ற ஏதேனும் ஒரு வட்டத்துக்குள் தங்களை சுருக்கிக்கொள்ளாமல் பல்வகை படைப்புகளையும் எழுத முனைவது அவர்களின் வெற்றிக்கும் பன்முகத்திறமைக்கும் சான்றாக அமையும். அதை இந்த நூலின் வழி நிரூபித்திருக்கிறார் எழுத்தாளர் ஆர்.மணிவண்ணன் அவர்கள்.

                நூலின் நேர்த்தியான வடிவமைப்பு நூலின் வெற்றிக்கு மற்றுமொரு காரணியாக அமைந்து சிறப்பு சேர்க்கிறது. எனினும், நூலில் ஆங்காங்கே உள்ள எழுத்துப்பிழைகளை சரி செய்திருப்பின் இன்னும் சிறப்பாக அமைந்திருக்கும்.

நூல் மதிப்புரை

கவிஞர் ச.கோபிநாத்

சேலம்

9790231240, 8438256235

நூல் வாசல்

மனதோடு மழைச்சாரல்

கவிஞர் ச.கோபிநாத்

நூல்                       : மனதோடு மழைச்சாரல் (கவிதைத் தொகுப்பு)

ஆசிரியர்             : கவிஞர் இந்துமதி

பக்கங்கள்          : 64

விலை                 : ரூ.50/-

வெளியீடு         : வாசகன் பதிப்பகம், சேலம்

           இவ்வுலகம் எங்கெங்கும் அழகானது. அந்த அழகான உலகத்தில் ஒவ்வொன்றும் கவிதையாய் உள்ளது, கவிதையால் நிறைந்துள்ளது. சாமானியர்கள் அதை சகஜமான காட்சியென கடந்து செல்கையில், கவிஉள்ளம் படைத்தவர்கள், கவிக்கண் கொண்டு  அவற்றை நோக்கி, கவிதையாய் வடித்து இவ்வுலகிற்கு படைப்பாய் பரிசளிக்கிறார்கள்.

                சாதிக்க வேண்டும் என்ற ஆசை எல்லோருக்கும் உண்டு. அவரவர் திறமைகளுக்கேற்ப அவரவருக்கான துறைகளை தேர்ந்தெடுத்து அதில் சாதிக்க முனைந்து செயலாற்றி வருகிறார்கள். அத்தகைய சாதிக்கும் உத்வேகத்துடன், எழுத்துத் துறையை தனக்கான களமாய் கொண்டு தன் முதல் கவிதைத் தொகுப்போடு இலக்கிய உலகில் அடியெடுத்து வைத்திருக்கிறார் கவிஞர் இந்துமதி.

         உழைப்பின் பரிசை உழைப்பாளிகளுக்கு வழங்குபவை வியர்வைத் துளிகள். “வியர்வைத் துளிகள்” என்னும் கவிதையில், உழைப்பின் விளைவாய் மேனியெங்கும் பூக்கும் வியர்வைப் பூக்களை மார்கழி மாதத்தில் பூக்கும் பனிப்பூக்களோடு ஒப்பிட்டிருக்கிறார் கவிஞர்.

                “உழைப்பின் தவத்தால்

                மலரும்

                மார்கழி மாத

                பனிப்பூக்கள்”

                எல்லோருக்கும் பொதுவாக இருக்கும் வானத்தைப் போல், எல்லோரையும் பொதுவாக கருதி இவ்வுலகில் பேதமில்லாது பெய்வது மழை. அத்தகைய மழை மனிதர்களில் பேதம் பார்க்காது, சமத்துவத்துடன் நடந்து கொள்கிறது என்பதை “சமத்துவக் குளியல்” என்னும் கவிதையில் சுட்டிக்காட்டுகிறார் கவிஞர்.

                “இதோ ஒரு சமத்துவக் குளியல்

                உயிருள்ள மனிதர்களும்

                உயிரற்ற பொருட்களும்…

                கொட்டும் மழையில்!”

                குழந்தைகள் முதல் பெரியவர்கள் வரை மழையை ரசிக்காதவர்களில்லை. மழையும் மழைக்காலமும் ரசனைக்குரியவை. மழை நிலத்தை நனைப்பதைப்போல, மனதை ஆனந்தத்தால் நனைக்கவல்லது என்பதை “மழைத்துளி” என்ற தலைப்பிலான தன் இன்னொரு கவிதையில் கூறுகிறார் கவிஞர்.

                “வந்து விழுந்தவுடன்

                மண்ணைப் போன்றே                  

                நனைத்து விடுகிறது

                மனதையும்

                ஆனந்தத்தால்…”

                இவ்வுலகில் வாழும் ஒவ்வொரு உயிர்க்கும் ஒரு நோக்கம் உண்டு. அந்த நோக்கத்தை கண்டறிந்து, அதன் இலக்கை அடைய உயிர்கள் முயல வேண்டும். அப்போது தான் வாழ்தல் அர்த்தமுள்ளதாகும். அந்த வகையில் மரிப்பதை மறந்து முகம் மலர்ந்து மலர்கள் மணம் வீசுகின்றன என்று மலர்களின் வாழ்தலை அர்த்தமுள்ளதாக்கியிருக்கிறார் கவிஞர்.

                “மண்ணில் பிறந்து

                மரிப்பதை மறந்து

                மாசில்லாமல்

                மணம் கமழ வாழும்

                மனித பிம்பங்கள்…”

                கவிதைக்கு அழகு கற்பனை. அந்த கற்பனையின் அழகியலில் தான் கவிதை அழகாகிறது. “குடை” என்னும் கவிதையில் குடையை தொட்டாற்சிணுங்கியாக்கி, நிழலைக் கண்டால் குடை சுருங்குவதை தொட்டாற்சிணுங்கியோடு ஒப்பிட்டு, தன் கற்பனையால் கவிதைக்கு மெருகூட்டியிருக்கிறார் கவிஞர்.

                “வெயிலுடனும்

                மழையுடனும்

                ஒட்டி உரசி விளையாடுபவன்…

                ஏனோ…

                நிழலைக் கண்டாலே

                தொட்டாற்சிணுங்கியாகிவிடுகிறான்”

                கவிஞரின் கற்பனையை நமக்கு உணர்த்தும் இன்னொரு கவிதையாய் மலர்கிறது ஜன்னல் குறித்த கவிதை. “ஜன்னலோர வேடிக்கை” என்ற தலைப்பில் ஜன்னலோரம் பார்க்கும் காட்சிகள் இவ்வுலகை யதார்த்த சினிமாவாய் கண்முன் கொணர்கிறது என்கிறார் கவிஞர்.

                “சாமானியர்களின்

                அன்றாட வாழ்க்கையை

                எடுத்துரைக்கும்

                யதார்த்த சினிமா”

         “மிக எளிமையாக ஒவ்வொருவரின் தினசரி வாழ்க்கையோடு தொடர்புள்ள விஷயங்களைத் தொட்டு அவற்றின் இயல்பைச் சிதைக்காமல் சுமந்தபடி, நிதர்சனங்களைச் சுட்டிக்காட்டியபடி செல்கின்றன கவிஞர் ச.இந்துமதியின் மனதோடு மழைச்சாரல் நூலினுடைய அனைத்துக் கவிதைகளும்” என்று நூலின் அணிந்துரையில் பாவையர் மலர் இதழாசிரியர் – எழுத்தாளர் முனைவர் ம. வான்மதி அவர்கள் கூறியிருப்பதைப் போல, அன்றாட வாழ்வின் அம்சங்களை அதன் இயல்பை சிதைக்காமல் கவிதையாய் நம் கண்முன் கொணர்கின்றன கவிஞர் இந்துமதியின் கவிதைகள்.

        நூலின் எல்லாக் கவிதைகளும் விடுகதைத் தொனியில் இருப்பதும், தலைப்பை கொண்டே கவிதைகளை புரிந்து கொள்ளும் நிலையிலிருப்பதும் நூலின் வாசிப்பை சற்றே தொய்வாக்குகின்றன. எனினும், கவிஞரின் முதல் கவிதைத் தொகுப்பு என்ற முறையில் இந்நூல் சிறப்பாக வெளிவந்து அவரின் எழுத்துலக பிரவேசத்திற்கு அடித்தளமிட்டிருக்கிறது எனலாம்.

நூலாய்வு

கவிஞர் ச.கோபிநாத்

சேலம்

முட்டை பொம்மை

நூல்                       : முட்டை பொம்மை

ஆசிரியர்             : வேம்பார் ச.வள்ளுவன்

வெளியீடு         : வேம்பு மாணாக்கர் வாசிப்பு இயக்கம், விளாத்திகுளம்

பக்கம்                 : 32

விலை                 : ரூ. 15 /-

                குழந்தைகளின் உலகம் அலாதியானது. அந்த அலாதியான உலகம் கட்டுக்கடங்கா கற்பனையால் நிறைந்தது. அந்த கற்பனையை மேம்படுத்தி, குழந்தைகளின் சிந்தனைகளை அடுத்தநிலை நோக்கி இட்டுச்செல்ல்லும் ஆற்றல் கதைகளுக்குண்டு.

                அண்மைக்காலமாக சிறுவர் கதைகள் வருவது குறைந்து வருகிறது. இந்நிலையை போக்கும் விதத்தில் இனிதே மலர்ந்துள்ளது வேம்பு மாணாக்கர் வாசிப்பு இயக்கம் வெளியீட்டில் வெளிவந்துள்ள வேம்பார் ச.வள்ளுவன் அவர்களின் முட்டை பொம்மை.

                தனது கல்விப்பணிக்காக 2014ஆம் ஆண்டு தினமலர் நாளிதழால் வழங்கப்பட்ட ‘இலட்சிய ஆசிரியர்’ விருது, தமிழக கல்வி ஆராய்ச்சி நிறுவனம் வழங்கிய ‘ஆசிர்யர் செம்மல்’ விருது, தென்னிந்திய கலாச்சார அகாடமி வழங்கிய ‘சேவா ரத்னா’ விருது என பல விருதுகளால் கெளரவிக்கப்பட்டவர் நூலாசிரியர். பல்வேறு சிற்றிதழ்கள், வார-மாத இதழ்கள், மின்னிதழ்களில் படைப்புகளை எழுதி வரும் இனிய படைப்பாளர் நூலாசிரியர் வேம்பார் ச.வள்ளுவன் அவர்கள்.

                சிறுவர்களுக்கான ஏழு கதைகளுடன் 32 பக்க அளவில் இனிதே மலர்ந்துள்ளது இந்த முட்டை பொம்மை நூல்.

                மாறன் தன் பள்ளியில் நடக்கும் கண்காட்சிக்கு, தானே செய்த முட்டை பொம்மையை கொண்டு சென்று பரிசு பெற்ற “முட்டை பொம்மை” கதையே இந்நூலின் முதல் கதை. “வயதானவங்கக அறிவுப் பெட்டகம். அவங்க அனுபவத்துல இருந்து நமக்கு பல ஐடியாக்கள் தருவாங்க. யாரும் கேட்பதில்லை. கேட்ட நீ ஜெயிச்சுட்டே” என்று கதையின் நீதியாக பெரியோரின் அறிவுரையே கேட்க இனிதே வழிகாட்டுகிறார் நூலாசிரியர்.

                குற்றம் பார்த்தால் சுற்றம் இல்லை என்ற இனிய நீதியை எல்லாவற்றிலும் சுத்தத்தை எதிர்பார்க்கும் ரமேஷின் கதாபாத்திரத்தின் வழி, நெஞ்சில் நிலைநிறுத்துகிறார் நூலாசிரியர். இதே கதையில் யாரையும் ஏளனப்படுத்தக் கூடாது, ஆபத்தில் உதவும் நல்ல உள்ளங்களே நம் நல்ல நண்பர்கள் என்னும் நீதிகளையும் இழையோட விட்டிருப்பது சிறப்பு.

                செல்போன், கணினி போன்ற சாதனங்கள் மனிதர்களின் நேரத்தை விழுங்கிவருவது எல்லோரும் அறிந்ததே. அதிலும் செல்போன் விளையாட்டுகளில் தங்களை தொலைக்கும் குழந்தைகளின் நிலையோ இன்னும் அதிகம். அத்தகையை செல்போன், கணினியில் நாம் அதிக நேரம் செலவிடக்கூடாது என்பதை காட்டுக்குள் வாழும் மாருதியின் வழியாக நம் கண் முன் கொண்டுவருகிறார் எழுத்தாளர் வேம்பார் ச.வள்ளுவன் அவர்கள்.

                “தம்மின் தம் மக்கள் அறிவுடைமை” என்கிறது திருக்குறள். இன்றைய குழந்தைகள் பெரியவர்களைக் காட்டிலும் அறிவில் சிறந்தவர்களாக இருப்பது எல்லோரும் அறிந்த கண்கூடு. அத்தகைய அறிவிற் சிறந்த மாணவர்களை ஆசிரியர்கள் இனங்கண்டு பாராட்ட வேண்டும் என்ற நற்கருத்தை கண்முன் கொண்ர்ந்து, பெரியோரின்  அறிவுரையை கேட்டு நடக்க வேண்டும் என்ற நீதியையும் சொல்கிறது பூங்கா தாத்தா கதை.

                நம்மால் இயன்ற உதவிகளை பிறருக்கு செய்ய வேண்டும். அவ்வாறு செய்தால் நமக்கு எந்த குறையும் வராது என்ற நல்ல நீதியை பிரான்சிஸ் என்ற சிறுவன் மூலமாக வாசகர்களுக்கு உணர்த்தும் ஆசிரியர், பெற்றோரின் சூழல் அறிந்து பிள்ளைகள் நடந்து கொள்ள வேண்டும் என்பதையும் உணர்த்துகிறார்.

                தென்னைமரமும் பனைமரமும் சண்டையிடும் கதை. தென்னைமரங்களும், பனைமரங்கும் எந்தெந்த வகையில் நமக்கு பயன் தருகின்றன என்ற பட்டியலை அறிய இந்த கதையே போதும். மேலும் விட்டுக்கொடுப்பவன் கெட்டுப்போவதில்லை என்ற நீதியையும் உணர்த்துகிறது இக்கதை.

                இயற்கையை நேசிக்கும் இனிய மனப்பான்மையை குழந்தைகளிடம் வளர்க்க வேண்டும். அப்படி இயற்கையை நேசிக்க ஒவ்வொருவரும் அவர்களால் இயன்றளவு மரங்களை நட்டு வளர்க்கவும், பராமரிக்கவும் செய்ய வேண்டும் என்பதை “மரம் வளர்ப்போம்…!” கதையில் உணர்த்துகிறார் நூலாசிரியர்.

                இந்நூலில் இடம்பெற்றுள்ள ஏழு கதைகளும் ஒரே கல்லில் இரட்டை மாங்காய்கள் என்று சொல்வதை போல், நல்ல நல்ல நீதிகளை சிறுவர்களுக்கு உணர்த்துகின்றன. எளிய மொழிநடை சிறுவர்கள் வாசிக்க எளிதாகவும், அவர்களின் வாசிப்பை மேன்மைப்படுத்தவும் உறுதுணையாக இருக்கும்.

                விளாத்திகுளம், வேம்பு மாணாக்கர் வாசிப்பு இயக்கம் மாணவர்களின் வாசிப்புத் திறனை மேம்படுத்த, நல்ல நல்ல படைப்புகளை தேடிப்பிடித்து நூலாக வெளியிட்டு நற்பணியாற்றுகிறது. இத்தகைய நற்பணியில் மலர்ந்துள்ள இந்த இனிய நூலை மாணவர்களின் வாசிப்பை மேம்படுத்த வாங்கி ஆதரவளிப்பது சிறப்பாக அமையும்.

நூலாய்வு

கவிஞர் ச.கோபிநாத்

சேலம்

9790231240

கவிஞர் எம்.எஸ்.வேல் அவர்களின்

“இதயம் தொட்ட எழுதுகோல்”

நூல்                        : இதயம் தொட்ட எழுதுகோல்

ஆசிரியர்              : கவிஞர் எம்.எஸ்.வேல்

வெளியீடு           : சபரிமதி வெளியீடு, சேலம்.

பக்கங்கள்           : 80                                                                                                          

விலை                   : ரூ. 50 /-

                எழுதுகோலுக்கும் கவிஞர்களுக்கும் நெருங்கிய தொடர்புண்டு. கவிஞர்களின் இதயம் பேசும் மொழியை உணர்ந்து அதை தாளில் வார்த்தெடுக்கும் வர்ணஜால வித்தைகளை நிகழ்த்தவல்லது எழுதுகோல். சமுதாயத்தின் வளர்ச்சிக்கான விதைகள் விதைக்கப்படுவது எழுதுகோலால் தான். ஒவ்வொரு படைப்பாளரின் எழுதுகோலும் அவர்தம் எழுத்துகளும் சமுதாயத்தின் அடுத்தகட்ட நகர்வுகளை நிர்ணயிக்கும் ஆற்றல் பெற்றவை. அதனாலேயே படைப்பாளர்கள் பொறுப்புணர்ந்து செயல்பட வேண்டும் என்று எண்ணுகிறது சமூகம்.

                இத்தகு சிறப்பு வாய்ந்த எழுதுகோலில் தன் எண்ணங்களை மையாக ஊற்றி, இதயத்திலிருந்து எழுதிய கவிதைகளை “இதயம் தொட்ட எழுதுகோலாய்” தமிழுலகிற்கு வழங்கியிருக்கிறார் கவிஞர் எம்.எஸ்.வேல் அவர்கள்.

                கவிதைகளை அழகுபடுத்தி நம் நெஞ்சில் நிலைபெற செய்வது கவிஞர்களின் கற்பனையுணர்வு. பூக்கள் என்றாலே தனியழகு தான். பூக்கள் நிறைந்த சோலை மேலும் அழகு. சோலையில் மட்டுமல்ல சேலையில் வலம் வரும் பெண்களும் பூக்களே. இரண்டும் அழகே என்று தன் கற்பனையை வாசகர்களுக்கு விருந்தாக்குகிறார்  கவிஞர்.

                “சோலையில் மட்டுமல்ல

                சேலையிலும் அழகுதான்

                பூக்கள்”

               

                குழந்தைகளை விளையாடவிட வேண்டும், அப்போது தான் அவர்களின் உடல் ஆரோக்கியமும் மன ஆரோக்கியமும் பலப்படும். அத்தகைய குழந்தைகளில் உடல்குறைபாடு உள்ள குழந்தைகளை எப்படி விளையாட சொல்வது, என்ற தன் இரக்க மனதை கவிதையில் படம்பிடித்து காட்டுகிறார் கவிஞர்

''ஓடிவிளையாடு பாப்பா

கற்பிக்க மனமில்லை

போலியோ குழந்தைகள்''

நகரமயமாதலின் விளைவால் வாகனங்கள் பெருக, காற்று மாசுபடுவது நாளுக்கு நாள் அதிகரித்து வந்த வண்ணமே உள்ளது. காற்று மாசில்லாமல் இருந்தால் தான் சுற்றுசூழலும் மனிதர்களும் நலமாக இருக்க முடியும். மனிதர்களின் நலன் பேணவும் இயற்கையின் நலன் காக்கவும் கவிஞர் தன் கவிதைகளில் தீர்வுகளை முன்வைத்து நம் நெஞ்சில் நிலைக்கிறார்.

''எரிபொருள் குறை

வெடிபொருள் தவிர்

காத்திடும் காற்றின் கற்பு''

உணவு, உடை, இருப்பிடம் ஆகியவை மனிதனின் அடிப்படை தேவைகள் என்பது எல்லோரும் அறிந்ததே. இவற்றுள் எல்லோர்க்கும் எல்லாமும் கிடைப்பது அரிதாகி வருகிறது. முறையாக பராமரிக்கப்படாத நீர்நிலைகளால் ஆற்று பகுதியில் அவ்வப்போது வெள்ளம் வருவதும், அதில் வீடுகள் அடித்து செல்லபடுவதுமென மக்கள் பெரிதும் துயருறுவதை தன் கவிதைக்கண்  கொண்டு பரிதாபப்படுகிறார் கவிஞர்.

''காட்டாற்று வெள்ளநீரை

அள்ளிப் பருகினேன்

உப்புக்கரித்தது

கலந்தே இருந்தது

வீடு இழந்தோரின்

கண்ணீர்''

''எத்தனை பெரிய மனிதருக்கு எதனை சிறிய மனமிருக்கு, எத்தனை சிறிய பறவைக்கு, எத்தனை பெரிய அறிவிருக்கு'' என்று ‘ஆசைமுகம்’ திரைப்படத்தில் கவிஞர் வாலி அவர்கள் பாடல் எழுதியிருப்பார். பொருளாதார நிலையிலல்ல, நம் எண்ணங்களிலேயே நம் உயர்வுகள் இருக்கின்றன என்பதை,

''உயர்ந்த மளிகை

தாழ்ந்த நுழைவாயில்

விரட்டப்படும் வறியோர்''

என்று உணர்த்துகிறார் கவிஞர்.

                கற்பனையென்பது கவிஞர்களுக்கு கைவரப்பெற்ற வரம். கற்பனையே கவிஞர்கள் உயர காரணமாகிறது. கவிஞர் தன் கற்பனையை நூலின் பல கவிதைகளில் பதிவு செய்திருக்கிறார். உதாரணமாக மேகங்களில் தான் கண்ட பிம்பங்களை,

''சற்றுமுன் நான்கண்ட

பெருத்த யானை

மாறியிருந்தது

அழகிய தொகை

விரித்தாடும் மயிலை

அசையும் மேகங்கள்''

என்று கவிதையாக்கியுள்ளார்.

மரத்தின் வளர்ச்சிக்கு வேர்கள் காரணமாய் இருப்பது போல், இந்த உலகில் மனிதர்களை பிறந்த ஒவ்வொருவருக்கும் அவர்களின் பிறப்புக்கும் உயர்வுக்கும் நல்வாழ்வுக்கும் காரணம் அவர்களின் பெற்றோரே. ஆனால் வாழ்வில் தான் எதிர்பார்த்த நிலையை அடைந்தவுடன் அந்த வளர்ச்சி தன் சுயமுயற்சியால் வந்தது என பெற்றோரை புறந்தள்ளுவோரை தன் கவிதையில் சாடுகிறார் கவிஞர்.

''ஆணிவேராய் தாய் மண்ணிருக்க

அதன் பிடியாய் தந்தையிருக்க

சில அறியாக்கிளைகள்

உதிர்க்கின்றன வார்த்தைகளை

நான் தானை

வளர்ந்த மரமென்று''

''இதயம் தொட்ட எழுதுகோல்'' நூல் சிந்தித்து எழுதப்பட்ட கவிதைகளின் தொகுப்பு என்பதைவிட நான் சந்தித்த நிகழ்வுகளின் தொகுப்பு என்று கூறலாம் - என்று நூலின் என்னுரையில் கவிஞர் கூறியிருப்பதைப்போல், நூலின் கவிதைகள் சமூகத்தையும் கவிஞரின் உள்ளத்தையும் பிரதிபலிக்கின்றன. நூலில் இடம்பெற்ற குறுங்கவிதைகளை காட்டிலும் ஹைக்கூ கவிதைகள் சட்டென இதயத்தில் இடம்பிடிக்கின்றன. ''இதயம் தொட்ட எழுதுகோல்'' கவிஞர் எம்.எஸ்.வேல் அவர்களை இலக்கிய உலகில் சாதனையை தொடவைக்கும் ஆரம்பப்புள்ளியாக விளங்குகிறது.

நூலாய்வு

கவிஞர் ச.கோபிநாத்

சேலம்

ஓலைச்சுவடி முதல்…

உலகோர் வியக்கும்

உன்னத வாழ்வியலை

எல்லோரும் ஏற்கும்படி அளித்து

வாழ்வியல் நெறி வகுத்த குறள்…!

இல்லம் தேடி வருவோரை

பூத்து குலுங்கும் மலராய்

புன்னகை படரும் முகத்துடன்

இன்முகம் காட்டி உபசரிக்கும்

உன்னத விருந்தோம்பல்…!

எதிர்த்து வரும் பகைவரை

துணிந்து நின்று

நெஞ்சுயர்த்தி வீழ்த்தி

உயர்ந்து நிற்கும்

புறம் பேசும் வீரம்…!

மனங்களுக்குள் மலர்ந்த

மகத்தான நேசத்தால்

மண்ணில் வரலாறாய் பதிந்திருக்கும்

அகம் பேசும் காதல்…!

காலங்கள் பல கடந்தும்

வளம் குன்றாது

இளமை மங்காது

உயர்ந்து நிற்கும் உன்னத மொழியாய் தமிழ்…!

நீளும் பட்டியலில்

தொடர்ச்சியாய் தடம் பதிக்கின்றன

தமிழனின் பெருமைகள்

ஓலைச்சுவடி முதல்

புகழை சுமந்தபடி…!

கவிஞர் ச.கோபிநாத்

சேலம்

நன்றி - தினமணி கவிதைமணி

மறுஜென்மம்

திக்குத் தெரியாதக் காட்டில்

அலைவதை போல்

இலக்கு தெரியாமல்

நாளும் அலைகிறது

இலக்குகளை இழந்த மனம்.

கண்முன் தென்படும்

பாதைகள் அனைத்தும்

இலக்கு நோக்கு இட்டுச்செல்லும்

என்ற நம்பிக்கையில்

ஒவ்வொரு கணமும்

நீள்கிறது தேடல்.

நீளும் பாதையில்

மனம் முழுக்க

எதிர்பார்ப்பை சுமந்து

தொடரும் பயணத்தின் முடிவாய்

கண்முன் விரிகிறது

முற்றுப்பெற்ற

மற்றுமோர் சூன்யமான சூழல்.

இருள்சூழ்ந்த வெளியில்

இலக்கு நோக்கிய

பயணத்தின் துணையாய்

மனமெங்கும் நம்பிக்கை படர

ஒளியை நோக்கி இட்டுச்செல்லும்

பாதை மனதுக்குள் விரிகிறது

மறுஜென்மம் ஒன்றை பரிசளித்தபடி.

கவிஞர் ச.கோபிநாத்

சேலம்

நன்றி – தினமணி கவிதைமணி

கவிக்கோவுக்கு கவிதாஞ்சலி

ச.கோபிநாத்

பெரும்பரப்பாய் உலகெங்கும் விரியும்

தமிழ்க் கவிதை வானில்

பிறைநிலவாய் தோன்றிய

கவிதை நிலா!

விருட்சத்தை பிரசவிக்கும்

‘விதையாய் விழுந்தவன்’ - இவர்

‘முத்தமிழின் முகவரி’!

தமிழ்க் கவிதையுலகெனும்

‘பால்வீதி’யில் வலம் வந்து

‘சுட்டுவிரல்’ காட்டியபடி

‘நிலவிலிருந்து வந்தவன்’.

‘கரைகளே நதியாவதில்லை”யென

நிதர்சனம் பேசி

‘நேயர் விருப்பம்’ தனை நிறைவேற்றிய

‘ரகசிய பூ’.

‘எம்மொழி செம்மொழி’

என்ற பெருமிதத்துடன்

‘தட்டாதே திறந்திருக்கிறது’

என இளையவர்களை

ஊக்குவித்த உந்துசக்தி!

‘நெருப்பை அணைக்கும் நெருப்பாய்’

சுடர்விட்ட இவருக்கு

‘மரணம் முற்றுப்புள்ளி அல்ல’.

‘பாலைநிலா’வாய் இருக்கும்

தமிழ்க்கவிதையுலகிற்கு

இனி இவரின் கவிதைகளே ‘தேவகானம்’.

கவிஞர் ச.கோபிநாத்

சேலம்

குறிப்பு:

·        ‘…’ – இக்குறிக்குள் குறிப்பிடப்பட்டுள்ளவை கவிக்கோ அவர்களின் நூல்கள்.

நன்றி – தினமணி - கவிதைமணி